هڪ کان وڌيڪ ملڪن ۾ پيداواري عمل جاري رکندڙ،اثاثا/ سيڙپ رکندڙ يا خدمتون آڇيندڙ ادارن کي گهڻ- قومي ادارا سڏيو ويندو آهي. ’بين الاقوامي پورهيي جي تنظيم‘(ILO) جي وضاحت موجب اهڙن ادارن جوعالمي انتظامي سرشتي سان ترتيب ڏنل مرڪزي دفتر ڪنهن هڪ ملڪ ۾ قائم ڪيل هوندو آهي، جنهن کي ’جنم وارو ملڪ‘ (Home Country) چئبو آهي، جڏهن ته مختلف ملڪ جن ۾ سندس قائم ٿيل ڪارخانن ۽ دفترن ۾ ڪاروباري سرگرميون سرانجام ڏنيون وينديون آهي، تن کي ’ميزبان مُلڪ‘ (Host Country) ڪوٺبو آهي. دنيا ۾ ولنديزي ’ڊَچ ايسٽ انڊيا ڪمپنيءَ‘ کي پهرين گهڻ- قومي ادارو ڳڻجي ٿو، جنهن ڪاروباري تاريخ ۾ پهريون ڀيرو منهنجن شيئرز جي نيلامي ڪئي ۽کيس جنگ ڪرڻ، ٺاهه ڪرڻ، سڪو جاري ڪرڻ ۽ بيٺڪون قائم ڪرڻ سميت ڪنهن ننڍي حڪومت جيترا اختيار حاصل هئا. دنيا ۾ ڪيترا گهڻ- قومي ادارا اهڙا به آهن، جن جي ملڪيتن جو ڪاٿو ڪيترن ملڪن کان وڌيڪ ۽ آمدني پڻ ڪافي ملڪن جي مجموعي قومي پيداوار کان مٿي هوندي آهي. سندن اثر جو دائرو مقامي انتظاميائن سان گڏ مُلڪي سرڪارن،بين الاقوامي معيشيت ۽ عالمي پاليسي جوڙيندڙ ادارن تائين پکڙيل هوندو آهي. ان ڪري بين الاقوامي لاڳاپن ۽ ڀونءِ- واد سميت دنيا جو اهم معاملن تي اثر وجهي سگهنديون آهن. دنيا جي وڏن گهڻ قومي ادارن، جهڙوڪ ڪوڪاڪولا، وال مارٽ، نائيڪي، توشيبا، هنڊا، بي ايم ڊبليو، نيسلي، سوني، شيل ۽ مائيڪرو سافٽ وغيره جو تعلق امريڪا، جاپان ۽ اولهه يورپ جي ملڪن سان آهي